Livelihood project sa KALIPI/ERPAT UCHG mapadayon

GILANTAW’NG mapadayon ang pagpatuman sa livelihood project alang sa mga sakop Kalipunan ng Liping Pilipina (KALIPI) ug Empowerment and Reaffirmation of Paternal Abilities (ERPAT).

Kini human nadawat sa Konseho sa syudad ubos ni Bise Mayor Kikang Uy ang hangyo ni Mayor Oscar Moreno nga mahatagan sa katungod pagpirma sa Memorandum of Understanding (MoU) tali sa Ayala Foundation, Inc. (AFI) ug Oro Integrated Cooperative (OIC) aron mapadayon ang panagtambayayong sa pagpatuman sa KALIPI/ERPAT UCHG livelihood project.

Nasayran nga kini ang ikaduhang hugna sa kolaborasyon sa dakbayan ug AFI nga nasugdan niadtong tuig 2017 diin P1 ka milyon ang gitunol sa AFI aron mahatagan sa kapasidad ang marginalized sector sa komunidad.

Sa laing bahin, ang OIC nagsilbing depository bank sa tanang sakop nga mga benepisaryo sa programa ug gitahasan pagmonitor sa kwartang nadawat.

Ang maong programa maghatag og kahigayonan sa mga kabus nga molopyo sa pipila ka barangay nga mapalambo ang kapanginabuhian pinaagi sa pagpahigayon og Capacity Building programs.

Kini nga mga programa maghitsas sa matag pamilyang benepisaryo sa kahanas ug sa capital alang sa business development, entrepreneurial skills ug social responsibility.