Livelihood program sa transport sector gipalapdan

GIPAABOT nga mapalambo ang livelihood program sa sektor sa transportasyon dinhi sa syudad.

Kini human ang Konseho sa Syudad sa sesyon niadtong Lunes nga gidumala ni Bise Mayor Kikang Uy mipalabang sa ordinansa nga naghatag og panugot ni Mayor Oscar Moreno pagpirma sa Memorandum of Agreement (MoA) tali sa kagamhanan ug National Confederation Transport Union (NCTU) alang sa kolaborasyon sa pagpatuman sa mga programa ug proyekto ubos sa 2017 and 2018 Bottom-Up-Budgeting (BUB) projects.

Ang maong lakang magmugna sa Integrated Livelihood Center (One Stop Shop) Automotive Repair Shop, Vulcanizing and Car Wash shop diha sa Barangay Kauswagan.

Sa maong MoA, gilatid nga ang tinubdan sa pundo sa maggikan sa partnership sa lokal nga kagamhanan ug Department of Labor and Employment (DOLE) ubos sa Adjustment Measure Program (DOLE-AMP).

Niini, si Bise Mayor Kikang Uy mibutyag nga ang maong lakang maghatag og kaarangan sa livelihood program sa dakbayan sa pakigtambayayong sa nasyonal nga kagamhanan pinaagi sa DOLE nga nagtutok sa integrated system livelihood.

Sa iyang bahin, si konsehal Enrico Salcedo, chairman sa komite sa cooperative, mibutyag nga ang maong livelihood program dako’g tabang sa transport sector nga mapalambo ang kinabuhi sa ilang ginsakopan.

Ang ordinansa nga gipalabang sa konseho alang sa maong katuyuan gipaluyuhan sa komite sa cooperative ni konsehal Salcedo ug komite sa pamalaod ni konsehal Ian Mark Nacaya.