Listahan sa mga residente sa matag brgy gisugyot

HUGOT nga gisugyot ni Konsehal Bernie Esparcia, vice chairman sa komite sa arbitration, nga magbaton unta ang tanan barangay og updated nga listahan o’ directory sa tanan nilang residente.

Kini ang usa sa gihisgutan sa konsehal sa iyang programa sa kahanginan human siya personal nga mibisita sa buhatan sa Department of Labor and Employment (DOLE-10) aron masayran ang kasagarang hagit ug mulo sa buhatan dinha sa pagpatuman sa ilang mga programa.

Lakip sa mulo ug hangyo nga gipaabot sa kadagkoan sa ahensya ngadto sa konsehal mao ang pagbaton sa matag barangay og updated nga listahan o directory sa tanang residente alang sa sayon nga pagtunol sa mga hinabang ug benepisyo sa katawhan.

Gipasabot ni Konsehal Bernie nga mahinungdanon nga aduna gayuy updated nga listahan o direktory ang mga barangay sa ilang mga molupyo aron daling matumbok ang mga lehitimong residente ilabina sa mga panahon nga adunay kalamidad ug sa ingon dali ug hapsay ang pagtunol sa mga benepisyo. (SP/JRGalano)