Linya sa kuryente dihas Golden-36 Brgy Canitoan dili na madugay

Hayan matagamtam na sa mga molopyo sa Golden-36 Relocation Site, Barangay Canitoan ang dugay nang gipangandoy ug gihanyo nga mabutangan og poste aron makutayan sa linya sa kuryente paingon sa ilang tagsa tagsa ka panimalay.

Kini human gikompirma sa opisina sa City Housing and Urban Development Department (CHUDD) atol sa tigom sa komite sa urban poor ni Konsehal Edgar Cabanlas sa milabayng semana nga nahuman na paghimo sa Program of Works alang sa proyekto nga adunay gibanabanang galastohon balor P3.95 milyones.

Matod pa nga gipangitaan na sa tinubdan sa pundo ang proyekto aron masukip sa Supplemental Budget sa dakbayan.

Niini, si Cabanlas mibutyag nga hulatan na lang ang rekomendasyon sa Mayor alang sa pundo nga seguradong suportahan sa konseho.

Dako ang kalipay ug pasalamat sa mga residente sa dapit sa komite ni Cabanlas ug kasamtangang administrasyon sa kasulbaran sa ilang suliran.

Samtang nagpasalamat usab si Cabanlas sa pagsabot sa mga residente kay dili tanan gihangyo ug gikinahanglan sa katawhan ang diha-diha dayon matubag sa gobyerno tungod kay pangitaan pa man usab sa mga pamaagi.