Lim mitaho RPT share sa mga brgy narelease na

NAREMIT o nahatag na sa kagamhanan sa syudad ngadto sa kabaranggayan ang ilang pahat sa Real Property Tax kon RPT.

Kini ang malipayong gipahibalo ni Konsehal Yan Lam S. Lim, chairman sa komite sa Barangay Affairs, atol sa sesyon sa konseho niadtong Lunes nga gidumala ni Bise Mayor Kikang Uy.

Matod ni Lim nga human sa gipahigayong hiniusang tigom sa komite sa Finance ni Konsehal Edna Dahino ug sa iyang komite sa Barangay Affairs sa milabayng semana natuki ug nasolosyonan ang mulo sa mga barangay ug gilayong natunol na sa syudad ang share ka barangay.

Mahinumdoman nga si konsehal Enrico Salcedo sa miaging sesyon mipaabot sa maong isyu sa tinguha nga mahatag na sa kabarangayan ang ilang share aron usab magamit sa ilang operasyon ilabina sa pagserbisyo sa ilang mga ginsakopan.

Nunot niini, gipasalamatan ni Lim ang tanang sakop sa konseho ingon man usab ni Mayor Oscar Moreno sa ilang suporta nga maresolbar langan nga pagtunol sa maong RPT share.