Lim misuporta sa drainage project dihas Bugo nat’l hi-way

Hugot nga gisuportahan ni Konsehal Yan Lam S. Lim, chairman sa komite sa barangay affairs, ang drainage project sa Department of Public Works and Highways (DPWH) diha sa barangay Bugo.

Sa milabayng tigom sa komite sa public works ni Konsehal John Michael Seno, si Lim mipasabot nga dako kaayo og papel ang kapitan sa Bugo aron mapadali ang pagtibawas sa proyekto.

Nasayran nga sa kasamtangan dili pa makonektar ang alignment sa maong drainage tungod kay adunay mga nabiling straktura sa dapit nga nakababag human nagdumili sa paghawa ang mga nanag-iya niini hangtod ning panahuna hinungdan nga nalangan na ang pagtrabaho.

Matod niya nga kinahanglan gayud ang tabang sa kapitan aron mapadali ang pagtibawas sa proyekto ilabina nga dako kaayo kini og ikatabang nga masolosyonan ang mga pagbaha sa barangay. Tinabanga lang para daling matibawas ang proyekto, pamahayag ni Konsehal Lim.