Libreng WiFi sa pampublikong lugar dako’g tabang sa katawhan, Cabanlas

KUSGANONG gihangyo ni Konsehal Edgar Cabanlas, chairman sa komite sa urban and rural poor and housing development, nga malakip sa pagabutangan sa libreng WiFi koneksyon ang City Hall, Divisoria ug Gaston Park.

Kini human giaprobahan sa konseho atol sa sesyon niadtong Lunes nga gidumala ni Bise Mayor Kikang Uy ang Memorandum of Agreement (MoA) tali sa kagamhanang lokal ug Innove Communications Inc. alang sa pag-instalar sa libreng wireless internet services sa unom ka dapit nga gipanag-iyahan sa syudad.

Nagtuo si Cabanlas nga daghang katawhan ang makapahimulos ug makatagamtam sa maong libreng programa sa gobyerno.

Nunot niini, nanghinaut si Cabanlas nga makonsiderar ang mga dapit nga iyang gihangyo diin maoy sagad nga suroyan sa katawhan sa dakbayan.