Legalidad sa quarry operation dihas Bugo hisgutan

HISGUTAN sa umaabot tigom sa Komite sa Environment ni Konsehal Roger Abaday ang legalidad sa gihimong pagkalot dinha sa suba sa Upper Bantiles, Bugo.

Kini human gipahigayon sa komite ni Abaday ang pagsusi sa dapit niadtong milabayng adlaw. Mahinumduman nga ang mga residente sa Zone 1 Upper Bantiles, Bugo mireklamo sa nasinating pagbaha niadtong Hulyo 21, 2023 gumikan matod pa sa baga nga siltation nga niabot sa ilang dapit gikan sa giingong quarry operation o’ pagkalot sa ibabaw’ng bahin sa barangay.

Sa maong pagsusi, si John Tolentino, nagdumala sa giingong quarry operation, mibutyag nga aduna silay panugot gikan sa barangay ug sa syudad dinha sa pagpahigayon og desiltation sa suba nga nahimutang sa iyang luna. Kini, gawas pa sa iyang tinguha nga makatabang sa gobyerno pinaagi sa pagpalawom sa suba.

Gidapit nga motambong sa ipahigayong tigom ang mga representante sa City Engineers Office (CEO), Department of Public Works Highways (DPWH), Mines and Geoscience Bureau (MGB) sa Department of Environment and Natural Resources (DENR), mga residente sa dapit, kapitan sa Barangay Bugo ug ang nagpahigayon sa giingong quarry operation sa Upper Puerto. Ang pagsusi nga gihimo sa komite gikuyogan usab ni Konsehal Bernie Esparcia.