Legal Office gihangyo sa pagreview sa ASF ordinance sa syudad

GIDUSO sa Komite sa Agriculture ubos ni Konsehal Jay Pascual ngadto sa buhatan sa City Legal ang hangyo sa United Lechoneros of CDO Association, Inc. sa pag-amendar sa Ordinance No. 14032-2021 kon African Swine Fever Prevention Ordinance sa Cagayan de Oro City.

Ang ordinansa nagdili sa pagpasulod sa syudad sa Cagayan de Oro alang sa bisan unsang katuyoan sa mga baboy nga gikan sa Luzon ug uban pang dapit sa tuyo nga masanta ang sakit nga African Swine Fever (ASF).

Matod ni Pascual nga gikinahanglan ang tukmang rekomendasyon sa buhatan sa City Legal kay ang sugyot sa asosasyon nga pag-amendar kabahin man sa pagmulta sa makalapas sa maong ordinansa.

Niini, gitahasan sa konsehal ang buhatan sa City Legal sa pagreview sa maong ordinansa ug magsumite sa ilang rekomendasyon sa sunod nga tigom alang sa tukmang aksyon sa komite.