Lao misugyot palapdan pa ang tabang sa katawhan

SI Konsehal Teodulfo Lao Jr., chairman sa komite sa Public Utilities, mibutyag nga nakahatag na ug tabang ang syudad niining panahon sa pandemia apan mangita pa gihapon kini og dugang pama-agi nga matunolan sa tabang ang kinabag-ang katawhan sa dakbayan.

Kini ang pamahayag ni Lao agig reaksyon sa gipadangat nga special report ni Konsehal Lordan Suan sa sesyon niadtong Lunes nga gidumala ni Bise Mayor Kikang Uy kabahin sa sitwasyon sa dakbayan nga gipa-ubos sa Modified Enhance Community Quarantine (MECQ) diin apektado ang pipila ka mga establisemento ug daghan ang nawad-an sa ilang trabaho.

Sumala ni Lao nga gihimo sa kagamhanang lokal ang tahas nga pagtabang sa katawhan pina-agi sa pagtunol sa mga ayuda apan kinahanlan pa kining palapdan hinungdan nga gusto niyang masayran ang financial status sa syudad aron masuta kun asa pa pwedeng makatabang.

Niini giduso ni Bise Mayor Kikang ang maong sugyot ngadto sa komite sa finance, budget and appropriation ni Konsehal Edna Dahino uban sa komite sa social services ni Konsehal Girlie Balaba ug komite sa panglawas ni Konsehal Lourdes Gaane alang sa dugang pagtu-on ug rekomendasyon.