Lao misugyot matuki sa CIACAT gitahong pagsaka sa OSEC cases

DILI na kinahanglan nga magtigom pa ang mga komite sa konseho aron hisgutan ang gikatahong pagsaka sa kaso sa online sexual exploitation of children (OSEC) sa dakbayan ug Rehiyon10.

Kini ang reaksyon ni konsehal Teodolfo Lao, Jr., chairman sa komite sa public utilities ug energy, sa special report ni konsehal Edna Dahino atol sa sesyon niadtong Lunes nga gidumala ni Bise Mayor Kikang Uy.

Matod ni Lao nga adunay gimugna ang kagamhanan sa dakbayan nga taskforce alang niini nga matang sa pang-abuso sa kabataan nga gipangulohan ni Mayor Oscar Moreno.

Iyang gitumbok ang gimugnang City Inter-Agency Council Against Trafficking (CIACAT) nga gilangkoban sa lain-laing ahensya sa gobyerno sama sa PNP, Cyber Crime Unit, NBI, CSWD, City Prosecutors Office, Regional State Prosecutor, RTA ug komite sa women & family relations ug uban pang ahensya sa gobyerno.

Gipasabot sa konsehal nga diha mismo sa CIACAT anaa na ang hugot nga magpatuman sa balaod kay anaa man ang City Prosecutor’s Office, Regional State Prosecutors ug PNP nga daling makapasaka sa mga kaso batok sa mga nakalapas sa balaod.

Niini, si Lao miawhag ni Dahino nga mahisgutan kini nga isyu ngadto sa CIACAT alang sa tukmang aksyon ug masolosyonan ang pagsakasa online sexual abuse.