Lakang pagpreserbar sa pottery making sa Bulua suportado ni Abbu

SUPORTADO ni Konsehal Jose Pepe Abbu, Jr., chairman sa Komite sa Labor, ang lakang nga magpreserbar sa lokal nga produkto sa Barangay Bulua nga maong ang banga o kolon.

Kini ang gibutyag sa konsehal sa sesyon niadtong Lunes nga gidumala ni Bise Mayor Bebot Rodriguez agig reaksyon sa special report ni Konsehal Girlie Balaba kinsa nanawagan nga mapreserbar ang pottery industry sa maong barangay.

Gibutyag sa konsehal nga kaniadto, adunay factory o school sa pottery making nga nagtudlo sa mga pamaagi kay talagsaon gyud kaayo nga klase sa yuta ang gigamit paghimo sa mga banga, kaang ug kolon nga nahimong panginabuhian ug naila pag-ayo ang maong dapit.

Suportado usab ni Konsehal Jay Pascual ang maong lakang ug siya misugyot nga kini iduso sa iyang Komite sa Turismo aron mapanday ang ordinansa alang sa maong katuyoan.