Lakang pag-akredit sa mga SREs padayong tukion

PADAYONG tukion sa umaabot tigom sa Komite sa Trade and Commerce ni Konsehal George Goking ang lakang pag-akredit sa Service and Retail Enterprises (SREs) sa dakbayan dinha sa Department of Trade and Industry (DTI).

Mahinumduman nga gisugyot ang akreditasyon isip usa sa mga rekisitos dinha sa paglukat og business permits o’ licenses sa tinguha nga maprotektahan ang interes sa mga konsumedor.

Una na si Goking nga namahayag sa iyang pag-uyon sa lakang sa tinguha nga mapalambo ang mga negosyo dinhi sa dakbayan apan iyang giawhag nga angayang hatagan sa kahigayonan ang mga tag-iya ug tigdumala sa mga SREs nga mapasayon ang pagkuha sa maong akreditasyon.

Ang komite gitakdang magtigom sa Agosto 24, 2023 ug gidapit nga motambong sa tigom sila si DTI-10 Regional Director Ermedio Abang, City Administrator Atty. Roy Hilario P. Raagas, Business Permits and Licensing Division in Charge Jason D. Adaza, City Legal Officer Atty. Kenneth Tamala, Anti-Red Tape Authority (ARTA) Regional Chief Jutchell Nayra, Cagayan de Oro Chamber of Commerce and Industry Foundation, Inc. President Raymundo G. Talimio, Jr. CPA, MBM, Cagayan de Oro Chamber of Commerce and Industry Foundation, Inc. Chairman Efren T. Uy, Cagayan de Oro Fil-Chinese Chamber of Commerce and Industry President Henry Dy, Cagayan de Oro Fil-Chinese Chamber of Commerce and Industry Inc. Vice President Steven Teddy Tan ug uban pang mga adunay kalambigitan sa pagpatuman sa maong lakang.