Lakang matunol socialized housing units ngadtos labing nanginahanglan gihingusgan

APROBADO na sa unang pagbasa sa Konseho sa syudad sa sesyon niadtong Lunes nga gidumala ni Bise Mayor Kikang Uy ang ordinansa nga gipangamahanan ni Konsehal Edgar Cabanlas nga magkansela sa award sa mga wala nag-okupar og housing units nga gipanag-iyahan ug gidumala sa kagamhanang lokal sulod sa dugay nang panahon aron mahatag sa ubang mga kabus benepisaryo.

Tumong sa maong ordinansa nga dili ma-abusohan ang pribilihiyo nga gihatag sa gobyerno ngadto sa mga benepisaryo ug insaktong masunod ang nalatid nga probisyon sa Urban Development Housing Act (UDHA).

Sumala ni Cabanlas nga sa talaan sa opisina sa City Housing & Urban Development Department (CHUDD) mokabat sa 1,100 pa ka mga housing units ang wala maokupahi sa mga benipisaryo sa wala masayri nga hinungdan ug daghan pa usab ang angayan nga marelokar sama sa mga naapektohan sa redevelopmment sa Bolonsori Public Cemetery, mega dike project, demolisyon ug uban pa, sumpay ni Cabanlas.

Dugang pa niini nga dili angayan mabalaka ang katawhan kay kun adunay igong rason ang benepisaryo makasiguro kini nga mahatagan sa konsiderasyon sa gobyerno ug dili mahinayon ang pagkansela sa award.

Ang ordinansa padayong tun-an sa konseho sa syudad.