Laing higayon sa LWUA sa pagdumala sa COWD gisugyot ni Abbu

“PERHAPS let’s give them a chance to perform their duties outside any external forces nga makabalda sa ilang pagpanarbaho…Besides their appointment of this matter gikan man pud na sa national nga kagamhanan.”

Kini ang gibutyag ni Konsehal Joey Abbu, Jr., chairman sa Komite sa Labor and Employment, atol sa sesyon niadtong Lunes nga gidumala ni Bise Mayor Rodriguez agig reaksyon sa special report ni Konsehal Roger Abaday sa pagsupak sa lakang sa Local Water Utilities Administration (LWUA) nga naglugway sa pagdumala sa Interim General Manager ug mga Interim Board of Directors sa Cagayan de Oro Water District (COWD).

Tinuod na nga ang PD 198 nag-ingon nga naay autonomy ang mga Local Government Units (LGUs) nga magpatigayon sa ilang kaugalingong water district, pero pagkamugna usab sa Local Water Utilities Administration (LWUA) ang tanang local water district gawas sa Metro Manila giwala na sa administrasyon sa mga LGUs ug gibutang ubos na sa supervision sa LWUA.

Kung mahinumdoman ug uban sa kahibalo sa publiko nga sa milabayng mga bulan, adunay kagubot sa dihang gikuha sa LWUA ang COWD.

Pero sa iyang nahibaw-an ug basi kini sa mga dokumento nga ang COWD naa pud kontrata sa LWUA kalabot sa loan aron magamit sa re-piping ug rehabilitation sa mga tubo, tingali mao ang hinungdan nag-take over ang LWUA sa COWD, sumpay ni Abbu.

Pero, tingali, hatagan usab sila sa laing higayon sa pagbuhat sa ilang mga katungdanan, kay ang ilang pagkatudlo gikan man pud sa nasyonal nga kagamhanan,  panapos nga pamahayag ni Abbu.