Koordinasyon sa DPWH gihingusganni Cabanlas

BUOT ni Konsehal Edgar Cabanlas nga adunay hingpit nga koordinasyon tali sa Department of Public Works and Highways (DPWH) ug kagamhanan sa dakbayan aron nga harmonyos ang pagpatuman sa mga proyekto dinhi sa syudad.

Kini ang gibutyag sa konsehal atol sa tigom sa Komite sa Public Works kagahapon human gihisgotan ang  gisumiting Status Monthly Report sa DPWH kabahin sa mga nakompleto ug nagpadayon pang gitrabaho  nga mga proyekto dinhi sa syudad.

“Walay mahimo ang usa ka syudad nga wala ang DPWH kay sila man ang tig-implementar sa mga proyekto”, dugang pamahayag sa konsehal .

Mipasabot  ang konsehal nga  paspas kaayo ang paglambo sa ekonomiya sa Cagayan de Oro busa gikinahanglan gyud ang pagtinabangay  aron  maplastar ang pag-implementar sa proyekto ma lokal man o’ nasyonal. 

Sa iyang bahin, ang representante sa rehiyonal nga buhatan sa DPWH mibutyag nga kasagara nga nakitang problema nga dugay gakahuman ang proyekto mao  ang  hinay  nga proseso  ingon man ang pagbayad sa naapektohan sa road right of way, isyu sa estado sa yuta sa buhatan sa DENR ug  uban pa.

Niini, si Konsehal Cabanlas mihangyo sa buhatan sa City Planning Development Office (CPDO) sa  pagpasiugda og coordinating meeting uban sa DPWH Regional Director,  1st og 2nd Engineering District Engineers aron hiniusang hisgotan ug mapangitaan  og solusyon ang wala nangahuman ug  ang   umaabot  nga  mga proyekto sa syudad.