Kooperasyon sa katawhan pagsunod sa health protocols gihangyo ni Konsehal Salcedo

KINASING kasing nga gihangyo ni Konsehal Eric Salcedo, chairman sa Environment and Natural Resources sa konseho ang kooperasyon sa katawhan sa syudad pinaagi sa pagtinabangay nga masunod ang mga safety prorocols nga gisitar sa gobyerno.

Kini ang unod sa special report ni Konsehal Salcedo sa sesyon sa konseho niadtong Lunes nga gidumala ni Bise Mayor Kikang Uy human niya namatikdan nga sukad nga gipailawom sa Enhance Community Quarantine ang syudad nagpadayon gihapon ang pagasaka sa kaso sa mga natakbuyan sa makamatay nga virus.

Matod sa konsehal nga segun sa datos sa mga bag-ong kaso, nakita nga padayon ang pagsaka sa kaso sa Covid bisan og naka ECQ kini hinungdan nga gikabalak-an nga tungod sa pagsulod sa Delta Variant basin og mosamot pa ang pagtaas niini.

Gipasabot usab sa konsehal nga segun sa mga experto mas daling makatakaod ang maong matang sa virus hinungdan nga dako ang posibilidad nga basin ma-extend pa ang ECQ sa syudad.

Akong kinasingkasing nga pag-awhag sa atong mga katawhan sa ilang kooperasyon ug magtinabangay sa pagsunod sa mga safety protocols ug magpabilin nga mabinantayon para mapaubos nato ang transmission sa virus, panapos ni Konsehal Salcedo.