Kontrata alang sa pagtukod sa City College pirmado na

KINASING-KASING nga nagpasalamat si Konsehal Suzette Magtajas-Daba, Chairman sa Komite Edukasyon, sa administrasyon ni Mayor Klarex Uy sa padayong paghatag og pagtagad sa kalamboan sa edukasyon sa kabataan.

Kini human gipirmahan ni Mayor Uy ang Contract of Usufruct tali sa kagamhanan sa dakbayan ug Higaonon Indigenous Cultural Communities/ Indigenous Peoples (Higaonon ICCs/IPs) sa Nahilaran Ancestral Domain ug National Commission for Indigenous Peoples (NCIPs).

Ang lakang naglangkob sa paggamit sa loteng tukuran sa City College Campus dinha sa Sitio Nahilaran, Barangay Dansolihon.

Matod ni Daba nga sa pagtukod sa City College daghang kabatan-onan nga nanimuyo sa bukid-bukid nga bahin ang makaangkon og libreng de kalidad nga edukasyon. Siya dugang mipasalamat sa pagtambayayong ug kooperasyon sa mga lumad sa panguna ni Datu Roberto Cabaring (Datu Makilala) aron mahatagan sa katumanan ang usa sa mga Executive Agenda ni Mayor Uy nga pagtukod og City College.

“Kini dalan sa pagkab-ot sa gipangandoy sa mga Kagay-anong makahuman sa kolehiyo mga dili maglisod sa pagpatungha tungod kay anaa naman sa ilang tugkaran ang tunghaan,” pamahayag ni Konsehal Suzette Magatjas-Daba. (RNQuiblat/SP)