Konseho wala malambigit sa negosasyon pagpalit sa lote dihas Upper Dagong –Cabanlas

GIKLARO ni Konsehal Edgar Cabanlas, Chairman sa Komite sa Urban and Rural Poor and Housing Development, nga ang tahas sa Konseho sa Syudad mao lamang ang pagrepaso kun nahisubay sa insaktong proseso ang pagpalit sa lote nga maoy tukuran sa bag-ong city center ug dili makiglambigit sa negosasyon.

Kini ang pamahayag ni Cabanlas sa migawas nga isyu kabahin sa pagpalit sa lote diha sa Upper Carmen nga maoy balhinan sa pagatukurong bag-ong City Hall.

Matod niya nga tungod sa paglambo sa real estate industry sa syudad ang rason nga adunay pagsaka sa presyo sa mga lote apan ang importante nga walay kalapasan nga nahimo ug nahisubay sa balaod ug tukmang proseso ang tanan.

Niini, suportado ni Cabanlas ang programa ni Mayor Klarex Uy kay iyang nakita nga mausa ang tanang departamento sa City Hall dinha sa Upper Dagong ug dili na maglisod ang katawhan sa ilang mga transaksyon kay usa lang ka lugar ang padulngan ug makatabang nga mapagaan usab ang dagan trapiko sa sentrong bahin sa syudad.