Konseho uyon sa operasyon sa JE Hydro Corp dihas Balubal

APROBADO na sa konseho sa syudad ubos ni bise mayor Kikang Uy ang Resolosyon nga naghatag og panugot sa JE Hydro & Bio-energy Corporation pag-establisar og water treatment plant nga maoy mo-supply sa panubig sa barangay Balubal ug kasikbit nga mga dapit sa Upper Puerto ug Agusan.

Sa sesyon niadtong Lunes, hiniusang gisagop ang resolosyon nga giduso ni Konsehal Teodulfo Lao Jr., chairman sa komite sa public utilities, nunot sa tinguha nga mahatagan sa igong supply sa tubig ang mga molopyo sa nasangpit nga mga barangay.

Niini, gipahibalo ni Lao sa tanan nga mga supplier, investor ingon man sa mga kooperatiba nga gustong mo-supply sa panubig sa syudad nga andam ug abli kanunay ang konseho sa dakbayan sa pagpaminaw sa mga sugyot alang sa maong katuyu-an.

Mga programa, proyekto sa brgy Bonbon mapatuman na

PABORABLENG giaprobahan sa konseho sa syudad sa sesyon niadtong Lunes nga gidumala ni Bise Mayor Kikang Uy ang resolusyon nga nag-uli sa ordinansa sa barangay Bonbon diin nasukip ang ilang 2021 Annual Budget nga adunay gibanabanang kinitaan ug galastohon balor P11,263, 528.

Gihatagan og prioridad sa barangay ang pagpalambo sa ilang day care centers, pagrehabilitar sa mga bleachers, pagtul-id sa drainage system ug pag-improbar sa ilang health centers.

Gawas niini, gipunduhan usab sa barangay ang pag-establisar sa marine protected areas, pagtukod og pathways, pagrehabilitar sa footbridge, pagpalit og supplies ug ekipo nga magamit panahon sa kalamidad ug pagpatuman sa uban pang mga proyekto ug programa nga gilantawng magpalambo sa kinabuhi sa katawhan sa barangay.

Si Konsehal Yan Lam Lim, chairman sa komite sa barangay affairs ug nagpaluyo sa gipasakang resolosyon, mibutyag nga iyang gisuportahan ang maong lakang kay gitumong kini sa kalamboan sa ilang barangay.

Ang resolusyon nga gipalabang sa konseho alang sa maong katuyuan gipaluyuhan usab sa komite sa pamalaod ug reglamento ni Konsehal Ian Mark Nacaya.