Konseho naninguha maprotektahan ang kinaiyahan

KANUNAY nga nagpakabana ug gihatagan sa igong pagtagad sa Konseho sa syudad ubos ni Bise Mayor Kikang Uy ang pagproteher sa kinaiyahan.

Sa gipaabot aprobahan nga Cagayan de Oro Environment Code, nakalatid sa Article VI ang Watershed and Riverbasin Management sa tinguha nga maseguro ang pagdumala sa watersheds ug river system sa syudad ingon man maprotektahan ug marehabilitar ang watersheds.

Tumong niini nga maseguro ang kaabunda sa gikinahanglang supply sa tubig alang sa tagsa-tagsa ka panimalay, pang-agrikultura, pagpangisda, pang-industriyal ug usab sa pangkalingawan nga mga kalihokan.

Sa maong sugyot, ang kagamhanan ang responsableng magpatuman sa mga probisyon sa Environmental Code uban sa pakigtambayayong ug kolaborasyon sa Cagayan de Oro River Management Committee aron hingpit nga mapatuman ang programa sa pagmintinar sa Cagayan de Oro River.

Niini, si Bise Mayor Kikang Uy mipadayag sa kamahinungdanon sa maong balaodnon kay maghatag kini sa tukmang impormasyon sa katawhan nga matabangang mapalipdan ang watershed ug padayon nga mohimo sa mga lakang pagproteher sa katubigan alang sa kasamtangan ug umaabot pang henerasyon.

Ang sugyot nga Cagayan de Oro Environmental Code gipaluyuhan sa Komite sa Environment and Natural Resources ni Konsehal Enrico Salcedo.