Konseho naninguha hingpit mahunong illegal minings

NANINGUHA ang Konseho sa Syudad ubos ni Bise Mayor Bebot Rodriguez nga hingpit mahunong ang kalihukan sa illegal mining sa hinterland barangays.

Sa sesyon niadtong Lunes, si Konsehal Roger Abaday misugyot pagsagop og resolusyon paghangyo sa City Mining and Regulatory Board (CMRB) paghatag og lima ka tuig nga moratorium sa pag-isyu og mining permit ngadto sa mga bag-ong aplikante sa tinguha nga mahunong gayud ang illegal nga mga pagmina sa hinterland barangays.

Sumala ni Konsehal Romeo Calizo  nga adunay mga operators nga pakitaan ka lang sa permit sa sand and gravels pero ang tinood gamina sila ug ang nakapait kay dili lang sila gamina diha sa suba apan gamina usab sila sa kabukiran nga makadaot sa kinaiyahan.

Samtang si Konsehal Edgar Cabanlas mibutyag nga angayan ibalik kini ngadto sa komite alang sa dugang pagtuon aron nga mahan-ay ug mapakangayo og tambag gikan sa CMRB kinsa maoy nasayod niini.

Niini, giduso balik ni Bise Mayor Rodriguez ang sugyot ni Abaday ngadto sa Komite sa Evironment alang sa dugang pagtuon ug rekomendasyon.