Konseho nanawagan sa akreditasyon sa mga CSOs/POs sa Cagayan de Oro

Ang konseho sa syudad ubos ni Bise Mayor Bebot Rodriguez nanawagan sa tanang Civil Society Organizations (CSOs) ug People’s Organizations (POs) dinhi sa dakbayan sa Cagayan de Oro nga magpa-akredit aron mamahimong sakop sa Committee on People’s Organization sa City Development Council (CDC).

Kini pinasubay sa Ordinance No. 14334-2022 nga magpalig-on sa pakiglambigit sa mga CSO ug PO pinaagi sa pagmugna sa komitiba sa PO dinha sa CDC ug naglatid sa gahum ug tahas ug partisipasyon sa Local Special Bodies ug uban pang hunta, pundok, task force ug susamang mga grupo.

Ang maong lakang nunot sa probisyon sa Batakang Balaod nga nag-aghat alang sa pagpakigtambayayong sa gobyerno ug mga grupo o kapunungan sa komunidad.

Ang resolosyon nga gipasaka sa konseho alang sa maong katuyuan atol sa sesyon kagahapon gipaluyohan sa komite sa planning, research and innovation and people’s organization accreditation ug komite sa pamalaod ni Konsehal Ian Mark Nacaya.