Konseho nahingawa sa wala pagsipot sa interim board sa gipahigayong tigom

GIKAHINGAWA sa Committee-of-the-Whole sa Konseho ang wala pagtambong sa interim board of directors sa Cagayan de Oro Water District atol sa tigom  niadtong Biernes nga  gidumala ni Konsehal Romeo Calizo.

Mahinumduman nga gipatawag  sa konseho ang regular ug  interim nga board sa COWD,  Local Water Utilities Administration (LWUA)  ug Office of the Government Corporate  Counsel (OGCC) aron maresolbar ug patas nga madungog ang tagsa tagsa nila ka panig.

Tungod sa pakyas nga  pagsipot sa  interim  board, wala na gipadayon sa komite ang tigom  gumikan kay wala  gihapoy kapuslanan ang diskusyon  kon ipadayon kini   kay  wala man ang  usa ka panig.

Subay niini, ang komite  gitakdang mopatawag sa   laing tigom   sa umaabot Biernes,  Marso 21 ning tuig aron ipadayon ang  paghisgot ug  malaumon nga motunga  ang tanang  gidapit alang  sa daling kasulbaran sa problema. 

Lakip sa mitambong sa tigom  sila Konsehal Ian Mark  Nacaya, James Judith, Bernie Esparcia, Roger Abaday , John Kenneth Sacala, Roberto Cabaring  ug Bise Mayor Bebot  Rodriguez. (JRGalano/SP)