Konseho nagduso og resolusyon nga hugtanong nagkondena sa LWUA

MAYORIYANG giuyonan sa konseho sa syudad atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo ang resolusyon nga nagkondena sa lakang sa Local Water Utilities Administration (LWUA) paglugway sa pagdumala sa Interim General Manager Fermin Jarales ug mga interim Board of Directors sa Cagayan de Oro Water District (COWD).

Gibutyag ni Konsehal Ed Cabanlas, atol sa iyang special report ug nangamahan sa resolusyon, nga dili angayan magpadayon sa pagdumala ang maong Interim General Manager ug Interim Board of Directors tungod kay walay nakitang kausaban o solusyon sa problema sa panubig sa syudad sa ilang pagdumala sulod sa unom ka bulan.

Hinuon ang paghatag og laing unom ka bulan isip paglugway sa Interim General Manager ug Interim Board of Directors nakamugna og kasamok sa maong buhatan nga nakaapekto sa operasyon ingon man sa mga kawani sa COWD nga nakahatag kalibog kanila, pamahayag ni Cabanlas. (MLRapanot/SP)