Konseho miuyon sa NFA Rice Sale Program sa dakbayan

MAHIMO nang mopalit og bugas ngadto sa National Housing Authority ang kagamhanan sa dakbayan.Kini human hiniusang giuyonan sa Konseho atol sa regular sesyon niadtong Lunes nga gidumala  ni Bise Mayor Bebot Rodriguez ang ordinansa nga naghatag katungod ni Mayor Klarex Uy sa pagpirma sa Memorandum of Agreement (MOA) uban sa National Food Authority (NFA), nga girepresentahan ni OIC-Manager, Kharren A. Retiza.

Ang MOA naglangkob sa pagpatuman sa NFA Rice Sale Program alang sa Dakbayan sa Cagayan de Oro.

Ang programa alang sa pagpangandam sa katalagman ug pagsiguro sa kaayohan sa mga biktima sa  kalamidad nahiuyon sa Safety, Security ug Human Development component sa RISE Agenda sa kagamhanan sa dakbayan.

Ubos sa maong MOA, ang Siyudad mihangyo ug mahimong mopalit ug bugas sa cash o’ credit basis sa National Food Authority (NFA), aron mahatagan ug diha-diha dayon nga tabang ang mga residente niini.

Ang mga bugas gamiton usab alang sa hinabang, pag-apod-apod, operasyon ug pagpundo isip kabahin sa pagpangandam sa kalamidad ug uban pang panginahanglan sa nagkalain-laing proyekto ug programa sa Siyudad.

Ang NFA misugot sa hangyo sa LGU nga mopalit ug bugas ubos sa mga termino ug kondisyon kay sila man ang ahensya sa gobyerno nga gimandoan sa pagmintinar sa  imbentaryo sa bugas sa bisan unsang oras aron magamit alang sa mga emerhensya ug kalamidad ug aron mapatuman ang mga programa isip kabahin sa pagtabang sa gobyerno sa pagpangandam panahon sa tanang matang sa kalamidad. (RNQuiblat/SP/photo credits: Palawan News)