Konseho misuporta sa riverbank rehab project dihas Baikingon

Padayong gisuportahan sa konseho sa syudad ubos ni Bise Mayor Bebot Rodriguez ang mga lakang pagpreserba sa kinaiyahan. Lakip niini ang programa pagrehabilitar sa kilid sa suba dinha sa barangay Baikingon.

Sa sesyon niadtong Lunes, hiniusang giuyonan sa konseho ang ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Bureau of Jail Management and Penology (BJMP) –Cagayan de Oro Jail Male Dormitory, lokal nga kagamhanan sa Baikingon ug Patingtingan Integrated Social Forestry Farmers Association (PISFFA).

Ang maong MoA naglangkob sa panagtambayayong sa upat ka partido dinha sa pagsuporta aron maangkon ang malahutayon nga riverbank rehabilitation project dinha sa barangay Baikingon. Mahinumduman nga ang BJMP male dormitory misagop sa Iponan Riverbank sa Baikingon nga bahin alang sa ilang National Greening Program. Ang duha ka kilometrong kilid sa suba gipaabot nga tamnan og 200 ka binhi sa kawayan ug 200 ka punoan sa forest trees.

Aron molahutay ang programa, ang mga partido mipadayag sa hugot nga pagsuporta pinaagi sa pagpatuman sa mga reforestation initiatives. Ang ordinansa nga gipalabang sa konseho alang sa maong katuyuan gipaluyohan sa komite sa environment ni Konsehal Roger Abaday ug komite sa pamalaod ni Konsehal Edgar Cabanlas.