Konseho misuporta sa pagpahigayon sa Queen of Cagayan de Oro 2022

HUGOT nga gisuportahan sa Konseho sa syudad ubos ni Bise Mayor Kikang Uy ang pagpahigayon sa Queen of Cagayan de Oro 2022 pageant.

Sa sesyon niadtong Lunes, mibisita sa Konseho ang 25 ka mga maanyag nga kandidata sa labing unang koronasyon sa Queen of Cagayan de Oro sa pagpasiugda sa Glamor Cagayan de Oro.

Nasayran nga dugay nang nagpahigayon sa maong pageant ang ubang bahin sa nasud apan ang dakbayan lang ang wala pa makasalmot niini hinungdan nga maoy nakab-ot nga programa sa LGBTQ community sa syudad sa tinguha nga mapasundayag usab ang talento sa mga Kagay-anon.

Niini, dako ang pasalamat sa mga tigpasiugda sa suporta nga gitunol sa mga sakop sa Konseho tungod kay mamahimo kining dalan aron mapadala ngadto sa national ug international pageants ang umaabot nga Queen of Cagayan de Oro.

Alang sa kaarangan ug kaayuhan sa tanang katawhan walay mapihig sa suporta gikan sa kasamtangang administrasyon, pasalig ni Bise Mayor Kikang Uy.