Konseho misuporta sa pagmugna sa USTP College of Medicine

Hiniusang gisuportahan sa Konseho sa Syudad ang pagmugna sa College of Medicine sa University of Science and Technology of Southern Philippines (USTsP).

Sa sesyon niadtong Lunes nga gidumala ni Bise Mayor Bebot Rodriguez, gisagop sa konseho ang resolusyon nga nagsuporta sa House Bill No. 973 nga gipasaka ni Kongresman Rufus Rodriguez nga magmugna sa College of Medicine sa maong unibersidad ug tawgon nga University of Science and Technology of Southern Philippines- College of Medicine ug maggahin sa igong pundo alang sa maong katuyuan.

Ang balaodnon maghatag sa kahigayunan sa mga tinun-an sa Rehiyon-10 nga makatungha sa medical school ilabina sa mga angayan ug kwalipikadong tinun-an nga dili makagahom sa kamahal sa gasto sa maong kurso diha sa pribadong tunghaan.

Giingon nga ang lakang maghatag sa de kalidad nga medical education ug trainings sa mga potential doctors ingon man motubag sa kakulangon sa mga doktor sa rehiyon. Nasayran nga ang House Bill 973 nga gihulipan sa House Bill 7089 giaprobahan na sa Kamara niadtong Pebrero 22, 2023.

Ang resolusyon nga gipalabang sa konseho alang sa maong katuyuan gipangamahanan ni Bise Mayor Rodriguez ug gipaluyuhan sa Komite sa Edukasyon ni Konsehal Suzette Magtajas-Daba ug Komite sa Pamalaod ni Konsehal Edgar Cabanlas.