Konseho misuporta sa lakang maangkon dugang kaarangan sa edukasyon sa kabataan

Paborableng gisuportahan sa Konseho sa syudad ubos ni Bise Mayor Bebot Rodriguez ang lakang aron maangkon ang dugang kaarangan sa natad sa edukasyon dinhi sa dakbayan.

Sa sesyon sa konseho kagahapon, hiniusang giuyonan ang mga ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa kagamhanan ug sa 12 ka mga unibersidad ug kolehiyo sa syudad nga naglangkob sa hingpit nga pagpatuman sa City College Scholarship Program (CCSP).

Ang kolaborasyon mapatuman tali sa Phinma-Cagayan de Oro College (Phinma-COC); Capitol University (CU); Golden Heritage Polytechnic College (GHPC); Liceo de Cagayan University (LDCU); Lourdes College (LC); Pilgrim Christian College (PCC); Southern de Oro Philippines College (SPC); STI College - Cagayan de Oro (STI-CDO); University of Science and Technology of Southern Philippines (USTP); Vineyard International Polytechnic College (VIPC); Xavier University (XU), ug Informatics Computer Institute-Cagayan de Oro Center, Inc.

Ang MoA naglatid sa mga giya dinha sa pagtunol sa scholarship grant sama sa mga kursong gihatagan og prioridad ug angayang grado nga makuha sa tinun-an aron mapadayon maong benepisyo.

Niini, ang dakbayan makakuha usab og 20% nga discount sa tuition fees gikan sa mga tunghaan. Si Konsehal Suzette Magtajas-Daba, chairman sa komite sa edukasyon ug usa sa nagpaluyo sa gipalabang nga ordinansa, midayeg ug mipasalamat sa administrasyon ni Mayor Klarex Uy sa pagpadayong paghatag og prioridad sa natad sa edukasyon.

Dako ang paglaum sa konsehal nga sa maong programa daghang kabataan ang makakab-ot sa gitinguhang kaarangan sa kinabuhi, panapos ni Daba.