Konseho misuporta sa hangyo sa rela drivers, operators

HINIUSANG gisuportahan sa konseho sa syudad sa sesyon niadtong Lunes nga gidumala ni Bise Mayor Kikang Uy ang resolosyon nga naghangyo ni Mayor Oscar Moreno nga ma-amendar ang gipakanaug nga Executive Order aron madugangan ang mga pasaherong mapasakay sa mga motorela nga nagbiyahian dinhi sa dakbayan.

Kini human gipaabot ni Konsehal Teodulfo “Bong” Lao, chairman sa komite sa public utilities, ang mulo sa mga driver ug operator sa motorela sa menos nga kinitaan gumikan sa gipatumang quarantine health protocol kanila.

Matod sa konsehal nga unta madugangan gikan sa tulo ngadto sa upat ka pasahero ang mapasakay sa mga motorela niining panahon nga gipailawom na sa General Community Quarantine (GCQ) ang syudad.

Medyo taas-taas na nga panahon ang giantos nga kalisod dala sa pandemya kay limitado lamang sa tulo ang gidaghanon sa pasahero basi sa gihatag nga giya sa IATF, pasabot ni Lao.

Siya midugang nga makatabang na sa mga motorela drivers ug operators ang lakang nga maluagan ang ilang pagpamasahero.

Dako ang ikatabang sa maong lakang nga sila makabawi sa giantos nga kalisod ilabina niadtong gipaubos sa Enhanced Community Quarantine (ECQ) ang dakbayan.

Malaumon si Konsehal Lao nga mahatagan sa daling aksyon ang maong hangyo sa tinguha nga makahupay sa gihambing kalisod sa motorela drivers ning panahon sa pandemya.