Konseho mipasidungog sa mga Kagay-anong PMAers

KUSGANONG gipasidunggan sa konseho sa syudad ubos ni Bise Mayor Bebot Rodriguez ang lima ka mga Kagay-anong migradwar sa Philippine Military Academy (PMA) Madasigon Class of 2023.

Sa resolosyon nga giduso sa bise mayor, giila ang maong mga Kagay-anon nga sila si 2nd Lt Cassay marie Chua (Philippine Navy-Marines), 2nd Lt Miller John Caselos (Philippine Army), 2nd Lt. Rapahel Gentallan (Philippine Air Force), 2nd Lt Kent Adrian Lumactod (Philippine Army) ug 2nd Lt Jason Sierra (Philippine Navy-Marines).

Gipasabot sa bise mayor nga dakong garbo ug dungog sa dakbayan ang naangkong kalampusan sa mga batan-ong Kagay-anon kinsa nagpakita sa ilang kahanas ug kaligdong diinha sa ilang pagbansaybansay sa military academy.

Giingon nga ang dedikasyon ug sakripisyo sa ilang gihimo nagpasundayag sa maluntaron nga patriotism ug professionalism nga hugtanong gihawiran sa dakbayan sa Cagayan de Oro. Ang resolosyon nga giduso sa bise mayor, gipangamahanan sa tanang sakop sa konseho ug gipaluyohan sa Komite sa Pamalaod ni Konsehal Edgar Cabanlas.