Konseho mipasalamat sa mga opisyal sa Zambo City

DAKO ang pasalamat sa Konseho sa Syudad ubos ni Bise Mayor Bebot Rodriguez sa mga opisyal, kawani ug katawhan sa Zamboanga City.

Kini tungod sa mainiton ug malinawon nga pagdawat sa panon sa mga opisyal ug kawani sa Cagayan de Oro nga mibisita sa Zamboanga City nunot sa pagpirma sa sisterhood agreement kalabot sa road safety.

Lakip sa hugot nga gipasalamatan sa konseho sila si Mayor John Dalipe, Bise Mayor Josephine Pareha, mga sakop sa konseho, department managers, mga kawani, ug mga sakop sa kwerpo sa kapolisan nga mikuyog sa panon aron malinawong makaabot sa Zamboanga City.

Gipasalamatan usab sa konseho ang tanang Zamboangueño sa ilang pagkama-abi-abihon ug mainitong pagdawat sa mga opisyal ug kawani sa lokal nga kagamhanan sa Cagayan de Oro.

Mahinumduman nga usa ka Memorandum of Understanding (MOU) ang gilagdaan sa duha ka dakbayan sa tinguha nga mapatuman ang kapaseguroan dinha sa kadalanan pinaagi sa panagtambayayong aron mamugna ang mga stratehiya, teknolohiya, datus ug ubang impormasyon kalabot sa mga insidente, pagka-angol, pagkamatay ug pagpatuman sa mga angayang lakang aron mahimong luwas ang tanan dinha sa kadalanan.