Konseho mipalabang sa Oro Halal Law

Gipalabang na sa konseho sa syudad ang ordinansa nga magpalig-on ug magpalambo sa halal industry dinhi sa dakbayan.

Sa sesyon sa konseho kagahapon nga gidumala ni Bise Mayor Bebot Rodriguez, hiniusang giuyonan ang Halal Ordinance of Cagayan de Oro City nga gitunguha pag-regulate sa paggamit sa Halal logo ug pag-aghat sa mga magpapatigayon pagpahimutang og halal section dinha sa ilang mga establisamento.

Si Konsehal Girlie Balaba, usa sa nangamahan sa ordinansa, mipasabot nga ang maong lakang nunot sa Republic Act 10817 nga naghan-ay sa Halal Export Development and Promotion Program ug nagdeklara isip palisiya sa nasud ang pagpalambo ug pagdasig sa halal industries nga dalan sa pag-angkon sa patas nga kahigayonan sa tanang mag-uuma ug mga producers ingon man magpadaghan sa lokal nga trabaho.

Ubos sa ordinansa, gidid-an si bisan kinsa o’ mga establisamento sa paggamit sa Halal logo nga walay saktong katungod, akreditasyon o’ sertipikasyon gikan sa Halal certifying body. Niini, gipahamtang ang multa nga P1 ka libo alang sa unang kalapasan, P2 mil sa ikaduhang kalapasan ug P3 mil sa ikatulo ug sunod pang mga kalapasan. Aron mapalambo ang industriya, ang ordinansa nag-aghat sa mga establisamento nga nagbaligya og mga pagkaon ug ilimnong halal pagpahimutang niini lahi sa uban pang mga paninda; pag-provide og halal lanes alang sa final packing sa halal food ug beverages; pagbulag sa halal food gikan sa haram food items; pagbutang og green colored baskets, carts, trolleys ug uban pang matang sa carrier alang sa halal food products; pagmintinar og managlahing delivery vans, storage units, containers o’ freezers nga eksklusibong gamiton alang sa halal food items; pagseguro nga tanang pansayan hitsas sa bidet ug pagbutang og prayer room ug Qiblah marking sa tagsa tagsa ka mga establisamento.

Dako ang panghinaut nila ni Konsehal Balaba ug Ian Mark Nacaya, mga nangamahan sa ordinansa, nga kini magpalig-on sa panagtambayayong tali sa mga ahensya sa gobyerno, lokal nga kagamhanan, sektor sa mga magpapatigayon ug uban pang stakeholders aron makab-ot ang dugang mga kahigayonan alang sa malahutayong ekonomiya sa halal.