Konseho mipahasubo sa pamilyang Armama

ANG konseho sa syudad ubos ni Bise Mayor Bebot Rodriguez mipaabot sa ilang pahasubo sa nahabiling banay ni Police Captain Abdulcahar Bacarat Armama.

Kini ang unod sa resolusyon nga hiniusang giuyonan sa konseho atol sa sesyon niadtong Lunes.

Nasayran nga si P/Capt Armama, miyembro sa PNPA “Masidlak” Class of 2017 ug kanhi estudyante sa kursong criminology sa Southern Philippines College, ning syudad.

Dako nga kawad-on sa dakbayan ang pagkamatay ni P/Capt. Armama isip kasamtangang hepe sa Cogon Police Station 2 kay dako ang iyang kontribusyon ilabina sa pagmintenar sa kahusay ug kalinaw sa syudad. 

Alayon niini, ang konseho hugot nga mihangyo sa mga hintungdang ahensya sa kagamhanan sa paghimo sa masubsob nga imbestigasyon aron masikop ug mataral sa hukmanan ang responsable pagpusil-patay ni P/Capt. Armama niadtong Oktubre 5, ning tuig.