Konseho mimugna og komite magtuki sa mga patakaran sa sabong

HINIUSANG giuyonan sa konseho sa syudad ubos ni Bise Mayor Bebot Rodriguez ang pagmugna og komite nga maoy magtuki sa mga patakaran sa pagpahigayon og sabong o’ derby dinhi sa dakbayan sa Cagayan de Oro.

Kini human ang konseho sa sesyon niadtong Lunes nga gidumala ni Presiding Officer Protempore Konsehal Edgar Cabanlas misagop sa resolosyon nga nagmugna sa tibouk konseho isip committee of the whole alang sa paghan-ay sa mga palisiya ug giya sa paghatag og panugot sa pagpahigayon og sabong o’ derby ingon man pag-uyon sa mga aplikasyon alang sa prankisa sa mga cockpit arena.

Si Konsehal Ian Mark Nacaya misugyot sa pagmugna sa maong komite aron dili malangan ang konseho sa pagtuki sa ubang mga butang nga bililhon alang sa katawhan.

Niini, ang gimugnang komite tahasan sa pagdeterminar sa angayang probisyon sa balaod dinha sa pag-aprobar sa mga lakang kalabot na sa sabong ug derby.

Ang maong komite pangulohan ni Konsehal Roger Abaday kinsa mao usab ang chairman sa komite sa games and amusement.