Konseho mihatag panugot mapatuman 13th supplementary feeding sa kabataan

Masugdan na sa pagpatuman ang ika-13 nga hugna sa supplementary feeding program alang sa kabataan nga nag-edad og dos anyos ngadto sa kwatro anyos.

Kini human giuyonan sa konseho sa syudad ubos ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Understanding (MoU) tali rehiyonal nga buhatan sa Department of Social Welfare and Development (DSWD-10) nga naglangkob sa pagpatuman sa ika-13 nga hugna sa Supplementary Feeding Program (SFP) subay sa Republic Act 10410 kon Early Years Act of 2013 ug RA 10533 kon Enhanced Basic Education Act of 2013.

Si Konsehal Girlie Balaba, chairman sa komite sa social services ug usa sa nagpaluyo sa gipalabang nga ordinansa mibutyag nga ubos sa MoU ang programa ipatuman dinha sa mga day care centers ug susamang fasilidad sa dakbayan sulod sa 120 ka adlaw.

Niini, ang DSWD gitahasan pagpalit sa gikinahanglang gamit sa programa sama sa pag-apod apod og dry rations, nutripacks ug nutribun ingon man fresh milk aron matubag ang panginahanglanon sa kabataan ilabina ang malnutrisyon.

Samtang ang dakbayan maoy magtumbok sa mga benepisaryo pinaagi sa CSWD ug City Nutrition Committee.

Malaumon si Balaba nga sa padayong pagpatuman sa programa daghan pang kabataan ang makabenepisyo ug usab masolosyonan ang malnutrisyon sa kabataan.

Ang ordinansa nga gipalabang sa konseho alang sa maong katuyuan gipaluyohan usab sa komite sa pamalaod ni Konsehal Ian Mark Nacaya.