Konseho mibasura sa kaso batok kapitan sa Kauswagan

Hiniusang gisagop sa konseho sa syudad ubos ni Bise Mayor Bebot Rodriguez ang orden nga giluwatan sa komite sa ethics and blue ribbon nga nagbasura sa kaso batok sa kapitan sa Barangay Kauswagan.

Kini human mipasaka sa Ex-Parte Motion to Dismiss ang mga nanumbong tungod kay matod pa ang ilang sumbong dili batok ni Kapitan Pedro Balite kun dili sa pagkapakyas sa buhatan sa Building Official (OBO) nga mo-isyu og fencing permit.

Gipasabot nga tungod kay dili man ang kapitan ang nagkulang sa pagpatuman sa balaod kun dili ang buhatan sa Building Official, walay katungod ang komite sa Ethics and Blue Ribbon ni Konsehal Edgar Cabanlas nga modungog sa maong reklamo.

Dugang niini, gibutyag nga aduna usay kaikag ang mga nanumbong nga mamintinar ang hapsay nga relasyon tali ni Kapitan Balite. Mahinumduman nga ang reklamo gipasaka sa mag-asawang Ramon Ua-o batok ni Balite tungod sa giingong pagbabag nga maaprobahan ang aplikasyon sa fencing permit dinha sa OBO.

Ang resolosyon nga gisagop sa konseho alang sa maong katuyoan, sa sesyon kagahapon, gipaluyohan usab sa komite sa pamalaod ni Konsehal Cabanlas.