Konseho miawhag sa mga negosyante makiglambigit sa CSR programs

HUGOT ang panawagan sa konseho sa syudad ubos ni Bise Mayor Bebot Rodriguez sa mga negosyante nga makiglambigit o’ mopasiugda og mga programa ug proyekto nga mahimong kabahin sa ilang Corporate Social Responsibility (CSR).

Kini ang unod sa resolosyon nga gipasaka sa konseho sa milabayng sesyon alang sa maong katuyuan. Si Konsehal George Goking, chairman sa komite sa ways and means ug usa sa nagpaluyo sa resolosyon, mibutyag nga lakip sa maong mga CSR programs ug projects maon ang urban renewal sama sa greening o’ regreening; social projects sama sa housing alang sa mga empleyado, pagtunol og libreng edukasyon, cultural revival ug uban pa; charitable programs; serbisyo ngadto sa mga beterano ug mga hamtong ug uban ang mga kalihokan nga magdala og kalamboan sa komunidad.

Ang panawagan subay sa probisyon sa Ordinance No. 13418-2018 kon Cagayan de Oro Investment Incentives Code of 2018. Ang gipasakang resolosyon gipaluyohan usab sa komite sa pamalaod ni Konsehal Edgar Cabanlas.