Konsehal Seno mihangyo sa DPWH mabisitahan dalan sa Puerto Heights

Gisugyot ni Konsehal John Michael Seno, chairman sa Komite sa Public Works ang Department of Public Works and Highways (DPWH-10), nga mabisitahan sa ilang Maintenance Division ang dalan paingon sa Puerto Heights sa Barangay Puerto ning syudad.

Kini aron nga malimpyuhan ang namatikdang balas sa kalsada nga dilikado kaayo sa mga motorista. Sa tigom sa Komite niadtong Martes nga gitambungan sa representante sa maong ahensya, gipahibalo sa Konsehal nga adunay iyang namatikdang mga balas sa kalsada tungod kay adunay nag-riprap sa unahan nga kon mag-ulan posibleng maanod sa ubos nga dilikado kaayo sa mga motorista, butang nga iyang gikabalak-an.

Gipasabot sa Konsehal nga importante kaayo kini nga maaksyonan aron nga malikayan ang mga disgrasya sa dapit. Niini, gipasalig sa taga DPWH nga ila kining aksyonan ug hatagan og pagtagad sa labing dali nga panahon.