Konsehal Nacaya misugyot pag-establisar og roundabouts

GISUGYOT ni Konsehal Ian Mark Nacaya, Chairman sa Komite sa Research and Planning Innovation, ang pag-establisar og roundabouts o’ mas naila nga rotunda dinhi sa dakbayan nga dako og ikatabang sa pagpagaan sa dagan trapiko sama sa mga nasud sa Europa ug uban pa.

Kini ang unod sa special report sa konsehal sa sesyon sa Konseho niadtong Lunes nga gidumala ni Bise Mayor Bebot Rodriguez.

Si Nacaya mipasabot nga sa laing nasod gikonsidera nga mas luwas ug environment friendly ang maong mga roundabouts.

Sumala sa konsehal nga talagsa raka makakita sa maong mga nasod og traffic lights diha sa ilang mga intersection tungod kay gagamit og roundabout kon rotunda sama diha sa complex sa Golez ug sa Tamparong.

Lakip sa gitumbok sa konsehal nga ang intersection o’ busy nga dalan mahimong ma-convert ngadto sa roundabouts ang Vamental Boulevard-Masterson Avenue nga entry sa Carmen-Nazareth Bridge, PN Roa Senior Avenue o Macapagal Highway, Grandia atubangan sa H Proper Coffee nga nag-intersect diha sa boulevard ug Paseo de Oro-Masterson Avenue.

Niini, gihangyo ni  Nacaya  nga  kini matun-an sa Roads and Traffic Administration (RTA), buhatan sa City Engineering ug City Planning ug  pagtino  kon duna bay mga luna  nga  mahimong  magamit  alang  sa maong katuyoan  ug kon ilang makita nga  mas feasible kini  kaysa  magbutang og traffic lights ug hand signal sa  mga  traffic enforcer.