Konsehal Lim nanghinaot makadawat kadtong wala pa makadawat sa Cash Ayuda

“PANDEMYA karon atong tabangan ang matag-usa”.

Kini ang giluwatang pamahayag ni konsehal Yan Lam Lim, chairman sa Komite sa Barangay Affairs, sa sesyon sa konseho niadtong Lunes nga gidumala ni Bise Mayor Kikang Uy.

Gani gipalasamatan ni Lim ang tanang kapitanes nga naghago aron magiyahan ang distribusyon sa Emergency Cash Ayuda ilabina sa mga volunteers nga naningkamot nga makatabang sa programa.

Hinoon giklaro ni Lim nga sa katibuk-an malinawon ang distribusyon sa Ayuda apan aduna lay mga reklamo nga adunay mga nagmahay apan kining tanan bunga lang sa fake news.

Gitumbok ni Lim ang mga storya nga nag-ingong P4 mil ang madawat kada tao apan wala nila gihulatan ang Bayanihan kon unsa gayud ang unod sa gipirmahan sa Memorandum of Agreement (MoA) tali sa lokal nga kagamhanan ug sa nasyonal.

Nunot niini, si Konsehal Lim malaumon ug nag-ampo nga mahatagan kadtong wala pa makadawat sa ilang ayuda labina miduso ang syudad sa dugang request ngadto sa nasyonal nga kagamhanan alang sa dugang pundo alang sa maong katuyoan.