Konsehal Goking gidapit guest speaker sa PCL-Region 1 fellowship night

SI Konsehal George Goking gipaabot motambong ug mohatag sa iyang bulawanong mensahe  sa ipahigayong Closing Program and Fellowship Night sa Local Legislative Enhancement Seminar ug Awarding  Ceremonies of Local Legislative Award ug Most Outstanding  Councilor nga gipasiugdahan sa  Philippine Councilors League (PCL)-Region  I. Kini ipahigayon sa umaabot Pebrero 16 ning tuig diha sa Limketkai Luxe Hotel.

Sa iyang imbitasyon ngadto ni Konsehal Goking  isip guest of honor and speaker sa maong kalihukan,  si Konsehal Carol Dizon-Sison, Regional Chairperson, mibutyag  nga ang   kasinatian ni Goking isip magbabalaod  ug  ang kahanas sa pagserbisyo makapadasig sa susama niyang  mga public servant  labina gayud sa  mga konsehal sa ilang rehiyon.

Gani, malaumon  si Sison  nga ang  presensya  sa konsehal magdalag dugang  kasadya sa ilang fellowship night tungod daghan niining mapaambit  nga kahibalo ug kasinatian diha sa pagpangatungdanan.