Konsehal Esparcia nangusog mapasabot ang bill deposit sa CEPALCO

GITINGUHA ni Konsehal Malvern Esparcia, Chairman sa Komite sa Climate Change Adaptation and Mitigation Disaster Risk Reduction, nga masayran ug mapasabot ngadto sa mga konsumedor ang bill deposit nga gisingil sa Cagayan Electric Power and  Light  Company (CEPALCO) kay nakapalibog kini sa mga konsumador kinsa nagtuo nga adunay pag-usbaw sa bayronon sa kuryente, matod sa konsehal sa iyang special report atol sa sesyon niadtong Lunes nga gidumala ni Bise Mayor Bebot Rodriguez.

Sumala pa ni Esparcia nga nakadawat siya og daghang mulo kabahin sa maong isyu hinungdan nga iya kining gipasuta aron malamdagan ang mga konsumedor sa nasangpit nga isyu.

Gipasabot sa konsehal nga ang bill deposit magdepende sa binulan nga bayronon sa kuryente diin kun misaka ang konsumo sa kuryente kinahanglan mosaka usab ang bill deposit. Hinoon pwede kini bayaran sa staggered basis, sumpay ni Esparcia.

Nunot niini gisugyot ni Konsehal Esparcia nga dapiton sa panag-tigom sa komite ang kadagkuan sa CEPALCO aron mapasabot kini sa katawhan.

Ang maong taho ni Konsehal Esparcia giduso ni Bise Mayor Bebot Rodriguez sa Komite sa Energy ni Konsehal Agapito Suan alang sa tukmang aksyon ug rekomendasyon.