Konsehal Esparcia mihangyo sa hingpit nga koordinasyon tali saDPWH, RTA

“KAKULANGON sa koordinasyon sa Deparmtent of Public Works and Highways (DPWH-10) ang hinungdan sa nahitabong pagho-ot sa dagan sa trapiko sa niaging semana diha sa Puerto Highway ug kasikibit nga mga barangay.”

Kini ang unod sa reaksyon ni Konsehal Bernie Esparcia sa special report ni Konsehal Ian Achas sa sesyon sa konseho niadtong Lunes nga gidumala ni Presiding Officer Pro Tempore Konsehal Romeo Calizo mahitungod sa iyang namatikdan nga paga-an nga dagan sa trapiko sa maong dapit ug ang iyang kahingawa sa mga pagsaway nga gibato sa maong ahenysa.

Matod ni Konsehal Esparcia nga sa gipahigayong tigom sa Komite sa Public Works sa miaging semana, giangkon sa ahensya ang ilang kasaypanan nga ilang gipatuman ang ilang gidusong traffic scheme bisan og wala pay pag-uyon ang Roads and Traffic Administration (RTA).

Nasayran nga usa sa proseso kon adunay susamang proyekto nga ipatuman ang DPWH, kinahanglan diay nga mosumite kini og traffic scheme ngadto sa RTA aron aprobahan, ug sa dili pa kini ipatuman kinahanglan nga adunay pagahimo-on nga dry-run alang sa maong katuyuan.

Hinoon, giila ni Konsehal Esparcia ang dakong kontribusyon sa ahensya sa kalamboan sa syudad apan iya lang gipahimangnoan nga dapat adunay igong koordinasyon aron hapsay ang pagpatuman niini.