Konsehal Esparcia gitudlo’ng dugang sakop sa komite sa games

Mahimo nang makapartisipar sa tanang hisgutanan sa komite sa games and amusement ubos ni Konsehal Roger Abaday si Konsehal Bernie Esparcia.

Kini human ang konseho sa sesyon niadtong Lunes nga gidumala ni Bise Mayor Jocelyn Rodriguez misagop og resolusyon nga nagtudlo ni Esparcia isip dugang sakop sa komite.

Si Konsehal Esparcia bisan sa dili pa kini membro daan nang gatambong ug apil sa mga hisgutanan sa komite sa miagi nilang mga tigom.

Nasayran ang komite sa games mao ang gitahasan sa konseho sa pagtu-on ug pagtuki sa mga butang nga may kalabutan sa mga dula ug kalingawan sama lotteries, jai-alai, horce racing, dog racing ,wrestling, cockfightings ug uban pa.

Ang resolusyon nga gipalabang sa konseho alang sa maong katuyuan gipangamahanan ni Konsehal Abaday.