Konsehal Emano misuporta pagtukod og parke alang sa mga hamtong, kabataan

GISUPORTAHAN ni Konsehal Yevonna Yacine Emano, Chairman sa Komite sa Senior Citizens sa Konseho, ang sugyot pag-establisar ingon man pagdevelop og parke nga gidesinyo alang sa mga hamtong ug  sa kabataan sa syudad.

Kini human gituki sa komite atol sa tigom niadtong Mierkoles ang special repot ni Konsehal Roger Abaday mahitungod sa pag-establisar sa maong facilidad.

Lakip sa gikonsiderar nga tun-an isip pahimutangan sa maong facilidad ang Duaw Park, Eco Park sa Upper Carmen, likod sa Amphitheater ug bakanting luna daplin sa suba sa Carmen.

Matod sa konsehala nga maayo ug dalaygon kini nga programa alang sa mga hamtong ug kabataan ug gani iyang gisugyot nga kini magahinan og igong pundo aron mahatagan sa katumanan.

Si Douglas Dabatian, hepe sa Office of Senior Citizen  Affairs (OSCA), hugot  nga nagpasalamat nga nahuna hunaan kini nga plano tungod kay makabenipisyo silang mga hamtong kinsa anaa na sa  kilumkilom nga bahin sa ilang kinabuhi gawas usab nga kaayuhan kini dili lamang sa hamtong apan lakip na sa kabataan.