Konsehal Emano misugyot marepaso Oro traffic code

Si Konsehal Yevonna Yacine “Yvy” Emano, chairman sa komite sa senior citizens, pabor sa sugyot ordinansa alang sa road safety sa syudad nga maghatag og multa niadtong mga malapason sa balaod.

Kini ang gipaambit nga panahum ni Emano human gituki sa tigom sa komite sa Public Utilities (Roads and Traffic Management) ni Konsehal Romeo Calizo ang sugyot alang sa subling pagtuon sa Cagayan de Oro Traffic Code.

Matod niya nga angayan nga repasohon ang Traffic Code sa syudad aron masuta ug matumbok ang mga kakulangon sa ordinansa.

Gikahingawa usab sa konsehal ang taho ni Engr. Sherwin Cabactulan sa Roads and Traffic Administration (RTA) ug Master Sgt. Diolanto sa Traffic Enforcement Unit sa kapolisan nga misaka ang insidente sa vehicular accidents karong tuiga. Gani, matod pa, sa unang quarter ning tuig mokabat na sa 19 ang namatay gumikan sa disgrasya sa kadalanan.

Si Emano misugyot sa pagmugna og Technical Working Group (TWG) nga tahasan sa pagtuon sa mga probisyon sa ordinansa ug pagsumete sa ilang rekomendasyon nga makonsiderar sa konseho.