Konsehal Calizo padayon nangitag pamaagi maplastar ang mga bao-bao

NAGPADAYON ang Komite sa Public Utilities ubos ni Konsehal Romeo Calizo sa pagpangita sa  pamaagi  nga makonsidera ang hangyo sa mga operators sa bao-bao ug maplastar ang ilang  pag-operate sa kadalanan.

Kini human ang  Roads and Traffic Administration (RTA) pinaagi ni Engr. Nonito Oclarit sa tigom sa komite sa miaging semana mipresentar sa ilang konsepto ug rekomendasyon mahitungod sa operasyon  sa mga 3-wheeled vehicles o bao-bao  dinhi sa syudad.

Sa maong rekomedasyon, gitugutan ang mga tricab  nga maka-operate gikan sa Lumbia paingon sa  kasikbit nga  mga hinterland  barangays. Gitugotan  usab  sila  nga mag-operate isip for hire sa mga barangay roads sa esting bahin nga wala pay public utility vehicles samtang hingpit nga dili tugotan ang mga tricabs nga  makaagi  sa mga national highways/roads.

Sumala ni Calizo nga iyang nasabtan ang gitanyag nga serbisyo sa mga bao-bao operators apan gikonsidera usab niini ang kaluwasan ug kasiguroan sa katawhan diha sa kadalanan.

Subay niini, gipasalamatan ni Calizo ang RTA sa ilang giluwatang rekomendasyon ug mihangyo  pagduso sa kompletong detalye  sa maong mga ruta lakip na ang mga limitasyon niini kon asa lang sila taman ug uban pa nga angayan konsiderahon diha sa ilang operasyon aron masigurong  hapsay ug hamugaway  ang tanan.