Konsehal Balaba misugyot pagtukod og Animal Shelter

GISUGYOT ni Konsehal Girlie Balaba, chairman sa Komite sa Social Services, ang pagtukod og Animal Shelter dinhi sa syudad.

Kini ang gipaabot sa konsehal atol sa 2024 Executive Budget Hearing niadtong Martes human iyang nasuta nga walay gigahin nga pundo ang buhatan sa City Veterinary (CVO) alang sa pagtukod og kapasilongan sa mga gi-rescue nga mga hayop sama sa iro, iring ug uban pa nga gipasagdan sa mga tag-iya.

Matod sa konsehala nga isip usa usab ka “Pet Lover” angayan nga matunol pud unta ang maayong pag-atiman sa mga napasagdang hayop nga na-rescue ingon man usab sa mga hayop nga nadakpan human nasapong naglatagaw sa kadalanan.

Sa iyang bahin, si Dra. Perla Asis, hepe sa maong buhatan mipasabot nga sa kasamtangan walay kaugalingon animal shelter ang kagamhanan sa syudad ug kon magtukod man niini nagkinahanglan usab kini balaod alang sa maong katuyuan.

Hinoon, gibutyag ni Dra. Asis nga ang kagamhanan adunay mga partners nga mga Non Government Organizations (NGOs) nga nagdumala og animal shelters alang sa mga na-rescue nga mga hayop sa syudad ug usa niini ang CDO Animal Welfare Society, Inc. nga nakigtambayayong sa tanang programa ug proyekto sa ilang buhatan.